Апелациониот суд Скопје ја отфрли жалбата на Бојан Јовановски – Боки 13, првоосомничен во „Рекет“, и тој останува во притвор, објави државната агенција МИА. На вчерашната јавна седница, Боки 13 побара да излезе од затворот во Шутка, каде е од 15 јули и да се лекува во болнички, а не притворски услови, макар и останала ублажена мерка притвор или други мерки против него.

„Имам органски проблем, не сум во добра психичка состојба. Јас сум во животозагрозувачка состојба, оштетен ми е нерв при операцијата на желудникот, која ја направив по своја волја. Белите дробови ми се оштетени, а имам и уште 4 дијагнози на кичмениот столб“, кажуваше Јовановски како се чувствува.

По разгледувањето на жалбата, Апелациониот суд одлучи дека сè уште постои опасност Боки 13 да побегне, како и да го повтори делото.

Во притвор во затворот во Шутка за „Рекет“ е и поранешната специјална обвинителка Катица Јанева, додека осомничениот Зоран Милески-Кичеец беше пуштен во домашен притвор.