Само 16 пожарникари ја чуваат од пожар територијата на три општини, Велес, Градско и Чашка. Освен во Општина Велес, оваа единица интервенира и во соседните општини Градско и Чашка. Според нормативите треба да има 40 пожарникари.

И тоа еден дел се пред пензија, дел се со сериозни повреди здобиени по интервенциите па на работа одат со скратено работно време и со поштеди. Така во Велес е десеткувана противпожарната единица.

Градоначалникот на Велес Аце Коцевски, упатил ургентно писмо до министерот за внатрешни работи, за да не се доведе во опасност имотот и животот на граѓаните а во пресрет на летната сезона, кога се зголемува бројот на интервенции на противпожарната единица.

Со овој број на вработени доведена во опасност сигурноста на граѓаните на општина Велес, но и соседните каде интервенира ТППЕ. Нормативот е на секој 1.5 илјади жители по еден пожарникар така нас ни требаат по стандарди 40 пожарникари а имаме 16 од кои некои се скратено работно време, други повредени. Од министерот Спасовски побарав веднаш да се најдат средства за вработување на пожарникари, одговор немам. А доаѓа лето и сезона на пожари а ние пожарникари немаме – изјави Коцевски.

П. ПЕЧКОВ