Агенцијата за храна и ветеринарство денеска ја одобри за кристење водата за пиење од водоводниот систем во Штип, откако жителите 5 дена се снабдуваа со цистерни. Врз основа на анализите направени од лабораториите во земјата и странство по барањето на Општината Штип, Агенцијата на филтер-станицата и на ЈП „Исар“ во Штип им го достави известувањето дека водата од водоводниот систем во градот е здрава и чиста и може да се користи.

Пред 5 дена, иако сите дневни анализи покажале дека водата е исправна, „Исар“ од превентивни причини препорача водата да не се користи за пиење и готвење туку само за техничка употреба, оти поради прифаќањето и преработувањето на водата од Хидросистемот „Злетовица“ се подесуваат системите за хлорирање.

„Штип, сега слободно може комбинирано да преработува вода од досегашните бунари во Штип и од ‘Злетовица’, кој во прва фаза ќе стартува со испорака на вода од 180 литри вода во секунда, а филтер-станицата може да прима и преработува над 300 литри вода во секунда. Штип, во однос на останатите соседни градови, со новата и софистицирана опрема што ја има во филтер-станицата сега е во позиција да филтрира и целосно преработува комбинирана вода и од штипските бунари и од ‘Злетовица’, со што го решава проблемот со водоснабдувањето најмалку за 50 години“, рече градоначалникот Иван Јорданов денеска кога го презентираше известувањето од Агенцијата за храна и ветеринарство.

Локалните власти најавија дека во наредниот период Штип ќе се потпре најмногу, ако не и исклучиво на водата од „Злетовица“, затоа што дистрибуцијата на водата од штипските бунари троши огромно количетво струја. Сметката само за јануари е 19 милиони денари. Анализите покажале дека трошоците за струја и преработката на водата од „Злетовица“ ќе го чинат градот до 7 милиони денари или најмногу половина од досегашниот трошок.

Т. ЈОВАНОВСКИ