Наместо предвидената парична глоба од 110-120.000 евра, биогасната електрана кај Градско ќе плати 18.000 евра, во денарска противредност за хаваријата што ја предизвика на 28 јули при што се случи голем помор на риба. Ова е спогодбено договорено на медијацијата со Министерството за животна средина (МЖСПП).

„На ден 13 септември пред Комисијата за спогодување при МЖСПП се одржа расправа во врска со поведената Постапка за спогодување кон ‘Вардар био процес’ Градско, за случената хаварија на ден 28.07.2024“, соопштија од Државниот инспекторат за животна средина (ДИЖС).

• ПУКНАЛА БРАНАТА СО ТЕЧНО ЃУБРИВО НА БИОГАСНАТА ЦЕНТРАЛА КАЈ ГРАДСКО, ИСТЕКЛА ВО ВАРДАР И СЕ СЛУЧИЛ ГОЛЕМ ПОМОР НА РИБА

Непосредно по излевањето на лагуната, тогашниот директор на Инспекторатот Сретен Стојковски, на прес-конференција на 30 јули кажа дека предвидената парична глоба е далеку повисока.

„При увидот на 27 јули е констатирано дека овој течен отпад кој што се користи како ѓубриво во земјоделски активности е транспортиран на соседна парцела без дозвола, направена е лагуна и истата е пробиена. Односно, течното ѓубриво е истечено во соседните парцели и во реката Вардар. Согласно Законот за животна средина, за овој прекршок од трета категорија е предвидена санкција од 110 до 120 илјади евра за правното лице кое е среден трговец и 6.000 евра за одговорното лице“, рече тогаш Стојковски.

• НАД 110 ИЛЈАДИ ЕВРА КАЗНА ЗА БИОГАСНАТА ЦЕНТРАЛА ВО ГРАДСКО ПО ГОЛЕМИОТ ПОМОР НА РИБИ ВО ВАРДАР ПОРАДИ БРАНАТА ОД КОЈА ИСТЕЧЕ ТЕЧНО ЃУБРЕ

Деновиве е извршен контролен инспекциски надзор по изреченото решение за хаваријата, со кое компанијата била задолжена да изврши празнење на лагуната од течен пост дигестат во целост, количина од 9.000 метри кубни. Требало да се искористи како течниот пост дигестат за аплицирање на земјоделските површини, но и обврска до го пополни ископот и израмни просторот каде беше лагуната.

При посетата на надлежниот државен инспектор констатирано е отстранување на загадувањето и враќање на животната средина во задоволителна состојба.

„Од страна на правниот субјект е постапено по задолженијата од решението, лагуната е испразнета и истата е прекриена и израмнета“, велат од Инспекторатот.

• ЦЕЛА ГОДИНА ЖИВЕЕМЕ СО СМРДЕА, ВЕЛАТ ЖИТЕЛИТЕ НА НАСЕЛБИТЕ ГРАДСКО И СТОПАНСТВО, ИНСПЕКЦИЈАТА УТВРДИ ДЕКА БИОГАСНАТА ЦЕНТРАЛА НЕМА ЗАШТИТА ОД РЕА

Жителите на населбата Стопанство близу Градско се жалат и реагираат на смрдеата која доаѓа од елементи кои биогасната електрана ги користи како репроматеријал за добивање електрична енергија.

П. ПЕЧКОВ