Катастрофални се последиците од намалениот наталитет, како и од големиот иселенички бран од кој е зафатена Битола во последните неколку години. Централните училишта во градот, а и околните во руралните средини никогаш порано не биле со помал број на ученици.

Ова е трета година како Советот на Општина Битола дава согласност настава да се изведува и во паралалеки со помал број ученици од минимално дозволениот, 24. Ваквите мерки се преземаат за да не дојде до завторање на паралелки и отпуштање на наставниот кадар.

Според извештаите кои основните училишта ги доставија до Советот, во училиштата во градот има паралелки кои работат дури и со пет ученици. Така, училиштето „Ѓорги Сугарев“ побарало во деветто одделение една од паралелките да опстојува со пет ученици. Во осмо одделение едната од паралелките е со седум, а друга со единаесет ученици.

Основното училиште „Гоце Делчев“ иако е во центарот на Битола, има паралелки со половина ученици од законскиот минимум, односно по 12 во четврто, петто, шесто и осмо одделение. Основното „Даме Груев“ има шест паралелки со по 14 ученици. Во „Кирил и Методиј“ кое исто така е во центраот на градот, од прво до деветто одделение останаа само по две паралелки. Слични се состојбите и во другите основни училишта.

Во подрачните училишта во околните рурални средини има исто така осипување на бројот на ученици. Така, во школото во Цапари од предметна настава има одделенија и со по тројца ученици, во Лопатица исто така, во Логоварди паралелка со пет ученици.

Во средните училишта во Битола најзагрижувачка е ситуацијата во земјоделството „Кузман Шапкарев“, каде една паралелка од прва година по земјоделско-ветеринарна струка опстојува со девет ученици. Во повисоките класови има паралелки со по шест до осум ученици. Дозвола да се формираат паралелки со помал број ученици од минимално дозволениот побараа и гимназијата „Јоспи Броз Тито“ по одделени предмети, економското училишта „Јане Сандански“, гимназијата “Таки Даскало“ и други.

Ж. ЗДРАВКОВСКА