Градоначалничката Данела Арсовска продолжува да менува директори во јавните претпријатија кои се под нејзина недлежност. Денеска се поставени нови директори во ЈСП „Скопје“, ЈП „Паркови и зеленило“ и во ЈП „Улици и патишта“.

Во ЈСП „Скопје“ на местото на Крсте Петревски, кадар на ГРОМ, поставен е Драги Кушовски. Арсовска ги разреши и директорите од т. н. огнено крило на ДУИ кои преминаа во Коалицијата Вреди и сега се во коалиција со ВМРО-ДПМНЕ. Во „Паркови и зеленило“ на местото на Сефи Шабани, кој претходно беше секретар во Општина Сарај, назначен е Мартин Ангеловски, а во „Улици и патишта“ на местото на Ќамил Ковачи поставен е Ванчо Умленски.

„Кушовски, Ангеловски и Умленски доаѓаат на позициите како професионалци од приватниот сектор, со поединечни портфолија секој повеќе од 15 години работно искуство на раководни позиции. Во следниот период ќе се посветат на отстранување и надминување на предизвиците со кои јавните претпријатија се соочуваат континуирано во изминатите децении, унапредување на работата на претпријатијата и реализација на програмските активности и проектите“, стои во образложението од кабинетот на Арсовска.

А. АНТЕВСКА