Десетици штркови бараат храна на опожарената површина на Долги Рид меѓу Велес и Чашка. Дојдени се од повеќе села на Општина Чашка каде тие се редовни жители преку лето. Штрковите го пребаруваат теренот за храна, бараат преживеани или изумрени животники од огнот, змии, скакулци, гуштери.

Центарот за управување со кризи (ЦУК) соопшти дека имаше вкупно 29 пожари во последното деноноќие, од коишто 7 се уште активни.

Седумте активни пожари на отворено се во: Општина Штип кај с. Селце и с. Пухче (каде што гори мешана шума); Општина Штип и во Општина Неготино, во реон на Армискиот воен полигон, високо над Криволак кон Пенуш, каде што има многу голема фронтова линија на пожарот (каде што гори ниска вегетација – смреки, трња, грмушки и нискостеблеста шума, претежно даб); Општина Македонски Брод: с. Брезница и с. Тажево каде што гори квалитетна борова шума, 15 вработени од Јасен помогнати преку ден од армиските 30-ина припадници, а и од неколкумина од ЈП „Национални шуми“, имаат само по неколку часа здивнување и речиси деноноќно се борат на линија кај реката-понорница Оча пред Борова Брезница да не се пробие огнот кон внатрешноста на заштитено повеќенаменско подрачје „Јасен“ од посебно значење за државата. Вчера армискиот хеликоптерот „ми-17“ во два наврата не можеше да дејствува од многу густ чад и небезбедни услови за дејство; Општина Чашка кај с. Габровник и с. Мокрени (каде што гори мешана шума и ниска вегетација) Таму линијата на огнот со повремени прекини и појаки жаришта е голема се до Мукос, над Богомила; Општина Чашка: месноста Мукос, има пожар префрлен од прилепска страна (при што гори ниска вегетација); Општина Долнени кај кај с. Небрегово гори нискостеблеста шума; Општина Долнени: с. Гостиражни, префрлен пожар од с. Богомила, Општина Чашка (каде што гори мешана шума и ниска вегетација).

П. ПЕЧКОВ