Марјанчо Велев од струмичко Добрејци е осуден на доживотен затвор за убиството на Александар Мицев пред две години, а телото беше пронајдено лани во резервоар во водите на браната Турија каде Велев ја фрлил и втората жртва Ристо Иљашев, за што во февруари годинава беше осуден 20 години затвор. Според обвинението,  Велев на 9 октомври во 2018 со огнено оружје пукал во главата на Мицев, по што телото го ставил во резервоар и го фрлил во браната Турија. Причина за убиството била наводна исплата на пари од купопродажен договор.

„Јавното обвинителство е задоволно од изречената пресуда доживотен затвор. Обвинетиот има право на жалба на пресудата во рок од 15 дена“, рече јавната обвинителка Виолета Милчовска.

Телото на Мицев, по кое полицијата трагаше повеќе од една година, беше пронајдено лани во август во водите на брана Турија, два месеца откако во буре беше пронајдено телото на Ристо Иљашев кој исчезна лани во мај. Велев во двете судски рочишта ги отфрлуваше обвиненијата и тврдеше дека е невин.

Обвинетиот, кој ја издржува првата казна од 20 години затвор за убиството на Иљашев, за втората неправосилна пресуда има право на жалба до Апелациониот суд.

В. ТРАЈКОВ