Еден пациент позитивен на ковид-19 почина на Инфективното одделение од Велешката болница, а почина и еден сомнителен случај, соопшти болницата.

„Почина пациентка на 81-годишна возраст од Свети Николе, кој е била примена на Инфективно одделение пред четири дена. Донесен е и пациент на 55-годишна возраст, без знаци на живот, без дишење и срцева реакција. Податокот од матичен доктор е дека е сомнителен на ковид-19, имал покачена температура последните денови и живеел сам со неговата мајка“, рече д-р Весна Николовска Неделкова, портпаролка на Општа болница Велес.

На ова Одделение има хоспитализирано 26 пациенти, четири помалку од вчера, кога министерот за здравство Венко Филипче кажа дека болницата во Велес е полна, но денес четворица пациенти се испишани по два негативни тестови. Од лежечките пациенти 23 се потврдено позитивни, а освен од Велес има и од Свети Николе, Кавадарци и Неготино. Денес во Велес, Министерството за здравство регистрира пет нови позитивни на ковид-19, од кои  тројца се заразени од членови на семејство, еден е вработен во Скопје, а еден во фабрика во Кавадарци. Има и пет оздравени, сите од домашно лекување.

П. ПЕЧКОВ