Градоначалничката Данела Арсовска денеска на прес-конференција кажа дека новиот Детален урбанистички план (ДУП) за населбата Ѓорче Петров е донесен незаконски, со подметнување на документи од градоначалникот Александар Стојкоски. Таа рече дека планот за градска четврт C3 е донесен без согласност на Град Скопје, што е незаконска постапка, а Министерството за транспорт и врски потпишало позитивно мислење и покрај забелешките на Град Скопје.
„Со овој план се покажа на дело коалицијата Мицкоски-Заев. На 17.02.2024 година во сабота, на вонредна седница на Советот на Општина Ѓорче Петров, спротивно на сите процедури и со кршење на повеќе закони изгласан е Детален урбанистички план со кој се предвидува изградба на бетонски монструм составен од 50 згради и три нови индустриски и деловни капацитети од хемиската индустрија. За овој план во два претходни наврати Градот Скопје дал негативно мислење и забелешки кои Општината била должна да ги отстрани и повторно да го испрати Деталниот урбанистички план на одобрување во Градот. Ние баравме да се намали висината на оние места каде што има десеткатници максималната висина да биде 5 ката, а каде има 21-катница максималната висина да биде 9 ката. По две негативни мислења, градоначалникот Александар Стојкоски одлучил, кршејќи го законот, да го прескокне градот и планот како конечен да го испрати на одобрување во Министерството за транспорт и врски со кое министерува Благој Бочварски, човек поставен од Зоран Заев“, рече Арсовска.
Таа кажа дека ќе поднесе иницијатива до Уставен суд за времено стопирање на овој план, додека целосно не се укине, а најави дека ќе поднесе кривични пријави против Стојкоски и вработените во Министерството за транспорт и врски за кршење на процедурите и носење на план без согласност на Градот.
Градоначалникот Александар Стојкоски кажа дека не биле точни обвинувањата на Арсовска дека ќе се градат три хемиски капацитети, туку еден објект од лесна индустрија. Тој кажа дека тие ги доставиле до Град Скопје измените, но немало одговор на Градот, па тоа се сметало за позитивно мислење.
„Градот има обврска да одговори на барањата на Општината во рок од 5 работни дена. Ако не се одговори тогаш се смета дека мислењето е позитивно. Арсовска после четвртата анкета во која се наоѓаат сега изгласаните измени не даде никакво мислење во рок од 72 дена и тоа значи дека се согласува со планот и затоа тој беше испратен до Министерството за транспорт и врски од каде е одобрен“, рече Стојкоски.
Тој кажа дека овој план ќе донесе приходи на Општината со што ќе биде решена финансиската стабилност за наредните години. Бил донесен на вонредна седница во сабота затоа што на 18 февруари истекува важноста на Законот за урбанистичко планирање.
„Согласностите од Министерството ги добивме вечерта во петокот. Ако не го донесевме до 18 февруари, ќе пропаднеше во вода планот и ќе требаше да почнеме од поново да ги правиме плановите во согласност со новите правилници. Тоа ќе беше губење време и 200.000 евра ќе беа залудно потрошени“, рече Стојкоски.
Денеска за овој план реагираа и од граѓанската иницијатива О2 кои обвинија за бетонизација и изградба на индустриски капацитети.
А. АНТЕВСКА
