Пожарот во дворот на фабриката „Треска“ е локализиран, а како што вели градоначалничката Данела Арсовска, тој е подметнат.  Во гасењето учествувале 55 пожарникари од Бригадата за противпожарна заштита и нема повредени лица.

„Целата противпожарна бригада работеше посветено цели два часа да го локализираат, да го изгаснат овој пожар. Во текот на изминатите два часа сме тука, и од индициите што ги имаме се работи за пожар што е отпочнат овде, со сомненија дека е подметнат. Информацијата што ја добивме од околните жители е дека виделе лица на овој потег непосредно пред пожарот и дека во повеќе наврати се случуваат пожари на овој потег. Веруваме дека во најкраток можен рок треба надлежните институции да преземат мерки, да разговараат и да се превенира ова што се случува на оваа локација. Важно е да се заштитат граѓаните, особено имајќи предвид дека се работи за исклучително голем број околни станбени куќи и деловни објекти што беа денеска загрозени со овој пожар“,  рече Арсовска.

Ова не е првпат да избие пожар во фабриката, но овој е најголем. (Фото: Принтскрин од дрон видео на ИКС)

Пожарот во Треска изби околу 14 часот. Ова не е првпат да избие пожар во фабриката, но овој е најголем.

Пожарникарите гасеа и со кофи. (Фото: СДК.МК)

Во рамките на фабриката, според постојниот Детален урбанистички план, треба да се градат згради и целосно да се бетонизира овој дел од градот, за што реагираат граѓанските организации. По барање на архитектите и граѓанските организации, од ексградоначалникот на Центар Саша Богдановиќ беше распишан конкурс за тоа како да се уреди просторот и избрани најдобрите решенија. Но, конкурсот беше за џабе распишан, затоа што актуелниот градоначалник Горан Герасимовски вели дека тој не може да се реализира оти имало приватни парцели.

А. АНТЕВСКА