Жителите на селото Климештани, оддалечено 15-ина километри од Охрид, денеска одржаа протест со блокада на каменоломот лоциран во непосредна близина на селото. Велат дека селото е покриено со прашина, минирањето им ги оштетува куќите, а земјоделските насади и водоснабдувањето им се загрозени оти концесионерот на каменоломот, трговското друштво „Нефи & А Инвест“ ДОО Охрид, не презема конкретни мерки за да се спречат загадуваьето, бучавата и опасностите од користењето на каменоломот.

„При работа на каменоломот, многу често се создава многу прашина која оди или во селото или во нивите, па не може надвор да се седи и да се вршат секојдневни активности. Исто така, по локалниот пат низ селото поминуваат тешки камиони, кои не смеат да се движат по истиот, го оштетуваат патот и создавает многу прашина. Истиот пат е тесен и при движење на камионите се создаваат опасности при разминување со други возила. Нема ни најави пред минирање во каменоломот и со тоа кај луѓето кои работат на нивите, кои се во близина, се создаваат опасности од повреди и стресови“, велат мештаните.

Тие бараат раскинување на договорот поради непочитување на обврските од страна на концесионерот.

„И покрај нашите повеќегодишни укажувања и интервенции кон концесионерот, тој нема преземено никакви мерки за отстранување на прашината и за асфалтирање на патот низ селото оштетен од камионите и не отпочна со отворање нов пат за движење на тешките товарни возила до каменоломот. Затоа бараме раскинување на договорот поради непочитување на истиот од страна на трговското друштво ‘Нефи & А Инвест‘“, вели Стефан Димитриески.

Мештаните од Климештани стравуваат и од здравствени проблеми оти прашината им предизвикува проблеми со дишењето, алергии и хронични болести, како астма и бронхитис.

„Скоро секој ден се гушиме во прашина. Се обидовме човечки да го решиме овој спор, имавме договор кој требаше да биде исполнет од фирмата која го раководи каменоломот. Сите рокови за санирање на патот и за решавање на проблемот со прашината се пробиени. Ние нема да чекаме да нѐ затрупаат во прашина“, вели повозрасен жител на Климештани.

Договорот за концесија за експлоатација на минерална суровина во каменоломот во Климештани е склучен во 2018 помеѓу Општина Дебрца и градоначалникот Зоран Ногачески, Месната заедница Климештани и „Нефи & А Инвест“ ДОО Охрид.

С. ВРЕНЦОВСКА