Штипската Клиничка болница во функција го стави новонабавениот апарат за гастроендоскопија, кој е единствен од ваков тип во јавното здравство во источна Македонија. Пациентите со акутна и хронична патологија на желудникот и дебелото црево од регионот ќе можат да го користат новиот современ апарат преку „Мој термин“ за комплетно дијагностицирање и лекување на дигестивниот тракт.
„Сега пациентите не мора да се праќаат во Скопје или во приватни клиники за дијагностицирање и лекување на малигни и други заболувања, со што ќе заштедуваат и време и пари. Апаратот е достапен и преку ‘Мој термин‘ и дневно се прегледуваат по седум пациенти или месечно над 200 пациенти“, вели директорот на болницата Ален Георгијев.
Тој нагласува дека апаратот не е донација, туку е набавен со сопствени средства на Клиничката болница и чини речиси 100.000 евра. За него треба да има и обучен стручен кадар. Во штипската болница на ова одделение ќе работат тројца нови специјалисти по гастроентерохепаталогија или вкупно четворица специјалисти ќе го опслужуваат новиот апарат за гастроендоскопија.
Т. ЈОВАНОВСКИ
