Котелот на биомаса кој беше набавен за загревање на спортската сала „Младост“ во Битола, а со кого на големо се фалеше претходната локална власт, една цела година не е комплетно ставен во функција. Иако котелот беше во салата уште декември минатата година и за него се потрошија 135 000 евра од ИПА фондовите, потребно е да се набават нови клима комори и пропратна опрема за да се згрее и големата спортска сала.
„Котелот е поврзан на системот и истиот е пуштен во работа. Но, потребни се нови клима уреди и пропратна опрема. Моментално има тендер за пелети така штом се набават пелети ќе се пушти радијаторското греење во помошните простории додека за главната сала потребни се нови клима комори, а за тоа имаме одобрен нов ИПА проект за нивна набавка“, велат надлежните.
Од новиот Управен одбор на ракометниот клуб „Пелистер“ кој беше избран деновиве, изјавија дека преку Агенцијата за млади и спорт и Општина Битола ќе се обезбедат средства за да се направат соблекувални по европски стандарди.
Ж. ЗДРАВКОВСКА
