Град Скопје и јас како градоначалник немаме склучено никаков договор и ниту еден денар од градската каса не е влезен во моето адвокатско друштво, одговори градоначалникот Петре Шилегов на обвинувањата од ВМРО-ДПМНЕ.
Утрово портпаролот на ВМРО-ДПМНЕ Наум Стоилковски на прес-конференција кажа дека градоначалникот Шилегов склучил договор во име на Градот со неговото адвокатско друштво за консултантски услуги и за тоа наплаќал по 50.000 денари месечно. Шилегов реагираше на ваквите обвинувања на ВМРО-ДПМНЕ нарекувајќи ги болни лаги.
„Јас земам пари од моето адвокатско друштво и тоа уредно е пријавено во мојот анкетен лист уште во 2015 година кога станав пратеник и откако станав градоначалник истото е наведено во него и анкетниот лист е предаден во Актикорупциската комисија. Од буџетот на Град Скопје не е дадено ниту денар. Очигледна е безидејноста, стравот и немоќта на ДПМНЕ да одговори на новите градски политики кои јас ги креирам во изминативе три години. Кога е таа структура во прашање тргнуваат кон креирање на лаги, на манипулации каква што беше оваа денеска“, рече Шилегов.
А. АНТЕВСКА
