Семејствата на загинатите во пожарот во модуларната болница во Тетово, заедно со младите од „Иницијатива нула“, упатија писмо до Јавниот обвинител на Република Северна Македонија, Љупчо Коцевски повторно да се покрене истрага за овој случај бидејќи, како што велат, постоеле сериозни пропусти при изградбата на објектот кои можело да бидат единствената причина за избивање на пожарот. Mодуларната ковид-болница се запали на 8 септември 2021 и изгреа 14 пациенти и нивни роднини.

„Како семејства на загинатите, бараме од Вас да ја обновите истрагата за вистинските виновници на пожарот во модуларната болница во Тетово, да формирате независен тим кој ќе ги испита сите аспекти на случајот, вклучително и евентуалното одолговлекување на постапката, да гарантирате дека судската постапка ќе се води без политичко-бизнис влијание. Бараме да обезбедите транспарентност и отчетност во Вашата работа, во согласност со законските обврски и да го земете германското вештачење како клучен доказ во истрагата. Ние нема да молчиме, ќе продолжиме да зборуваме за нашите најблиски кои ги изгубивме, за вистината, за правдата која е ветена, но никогаш донесена. Затоа, драг Љупчо, како наш сограѓанин од Тетово, Вие најдобро ја разбирате болката и гневот на семејствата на жртвите и на целата заедница. Ова не е само правно прашање. Ова е морална обврска – кон тие што ги изгубивме, но и кон сите граѓани што денес живеат со страв дека ова може да се повтори, а никој нема да одговара. Време е некој да преземе одговорност. Време е правдата да излезе од фиока“, се вели во пораката испратена од семејствата на загинатите во модуларната болница која денес беше прочитана пред Основниот суд во Тетово, пред почетокот на судското рочиште.

После четири одложени рочишта и сега со нов судија, Реџеп Муса, на 18 март конечно започна главната расправа во повтореното судење за пожарот во. На повтореното судење им се суди на тогашниот директор на Клиничката болница во Тетово Флорин Бесими и економскиот директор Артан Етеми, кои беа обвинети за кривичното дело Тешки дела против општата сигурност, и на правното лице ЈЗУ Клиничка болница во Тетово, за делото Предизвикување општа опасност.

Денеска се одржа второ рочиште кое траеше 5 часа, со давање изјави на вештите лица кои во текот на истрагата изработиле вештачење. Прво овластениот судски вештак по електротехника Ирфан Шаќири пред судот образложи дека по наредба на Јавно обвинителство извршил вешт наод за можните индиции за појава на пожар во објектот на модуларната болница за првото судење и останува на фактите изнесени во тој извештај.

При поставените прашања од Обвинителството тој рече дека целокупната постапка за доведување на електрична енергија од трафостаница до модифицираниот објект наречен модуларна болница е направен од две неквалификувани лица, вработени во Клиничка болница.

„Во комуникација со нив во врска со определување на тип на проводник тие не понудија документ. Рекоа дека се направени пресметки врз основа на разговор со повозрасни електричари кои им кажале каков кабел да користат од трафостаница за да има струја во објектот“, рече Шаќири.

На прашање на одбраната, дали се согласува со прашањето дека инсталацијата е изведена во спротивно од стандардите, вештото лица одговори со да.

Рубин Бошковски од Министерството за внатрешени работи (МВР), кој изврши форензичко испитување, рече дека при вештиот наод утврдиле настанување на механичко оштетување на продолжителниот кабел поради нагмечувања или превиткување, на кој бил приклучен дефибрилатор.

„Високата температура довела до согорување на изолацијата од кабелот и создавање на пламен“, рече Бошковски.
На прашање дали при увидот биле забележани противпожарни апарати, Бошковски рече дека не биле евидентирани во самата болница.

Сведочеше и професорката Анита Грозданова од Технолошко-металуршкиот факултет, која ги испитувала материјалите од кои е составена модуларната болница.

„Материјалите за изработка на префабрикуваниот контејнер ги задоволуваат барањата според спецификацијата на Министерството за здравство и истите се анализирани според процедури за соодветни својства за што гарантирам“, рече професорката Анита Грозданова.

Од Технолошко-металуршкиот факултет, сведочеше и Свето Цветковски, кој ги испитувал металите кои се користени при изведба на привремените објекти познати како модуларни болници. И тој потврди дека металните материјали се според спецификацијата наложена од Министерството за здравство.

Универзитетските професори Влатко Стоилков и Владимир Димчев од Факултетот за електротехника и информациски технологии при Универзитетот „Свети Кирил и Методиј“ во Скопје, изработиле вешт наод и мислење во писмена форма за тоа дали модуларните болница биле изградени според проектната задача согласно барањата на договорниот орган.

„Според препораките на Светска банка во Македонија имало четири типски објекти, а во Тетово бил изграден типски објект со ознака Ц на латиница. Во просториите на овие објекти, на еден кревет имало по една приклучница за електрична енергија (штекер) за еден и еден приклучок за кислород“, рече Стоилков.

По сослушувањето на вештите лица одбраната побара да се сослушаат и вештите лица од Германија кои имаат изработен извештај. Судијата Реџеп Муса рече дека според насоките на повисокиот апелациски суд, предлогот на одбраната се одбива.

„Постојат доволно докази за околности на настанот“, рече судијата.

Судијата ја прекина главната расправа поради истекување на работното време и ја закажа за 8 април, кога се предвидува да се читаат писмените докази од одбраната. Закажани беа и уште два термина, на 22 и на 28.

З. АНДОНОВ