ПЛАНИНАРИТЕ ЈА ЧИСТЕА ЛЕШНИЦА ОД СМЕТ И ПРОТЕСТИРАА ПРОТИВ ИЗГРАДБАТА НА МАЛИ ХИДРОЦЕНТРАЛИ

    ПЛАНИНАРИТЕ ЈА ЧИСТЕА ЛЕШНИЦА ОД СМЕТ И ПРОТЕСТИРАА ПРОТИВ ИЗГРАДБАТА НА МАЛИ ХИДРОЦЕНТРАЛИВо акцијата беа собрани десетици вреќи со смет и беа испратени пораки за заштита на Лешница (Фото: СДК.МК)

    Месноста Лешница на Шар Планина многумина ја сметаат за еден од најубавите предели на оваа планина. Ако порано до Лешница се доаѓаше само пешки или со теренско возило, сега, поради патот што е направен заради изградбата на една мала хидроцентрала, дотаму може да се дојде и со автомобил, а неодговорни излетници оставаат зад себе купишта смет. Поради ова, планинарскиот клуб „Јелак“ од Тетово и стотина планинари од повеќе градови организираа акција на чистење, која ја нарекоа „Чисто, како Лешница после нас“.

    Во акцијата која траеше неколку часови беа собрани десетици вреќи со смет. Акцијата се одвиваше во соработка со шумската полиција и јавното претпријатие „Национални шуми“, кои обезбедија транспорт на сметот од Лешница до Тетово.

    Додека се одвиваше чистењето, се одржа и протест организиран од активистите на „Зелен фронт“, кој беше усмерен против изградбата на малите хидроцентрали бидејќи една се гради токму на Лешница. Преку транспаренти „Спас за Лешница“, „Запрете ја хидромафијата“ и „Не го уништувајте срцето на Шара“, како и преку видеообраќање, беше побарано од надлежните државни институции итно да ја запрат изградбата на овој објект, кој, како што рекоа присутните, трајно ќе ги уништи Лешница и реката Пена.

    „Како Зелен фронт на граѓани, планинари, мештани на шарпланинските села, екоактивисти и љубители на планината, со денешниот собир сакавме да го искажеме нашето одлучно НЕ против малите хидроцентрали на Шар Планина. Тие прават неповратна еколошка штета, а корист имаат само поединци, кои, користејќи ја поврзаноста со државните и финансиските институции, се обидуваат да профитираат, уништувајќи ја природата“, се вели во соопштението на „Зелен фронт“ испратено од протестот во Лешница.

    Учесниците во акцијата на чистење и протестот најавија дека вакви акции ќе има и во иднина, додека целосно не се заштити природата на Шар Планина и не се престане со изградбите на малите хидроцентрали.

    З. АНДОНОВ

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира