Во густата магла денеска на Попова Шапка деветмина скијачи залутале на скијачките патеки. Меѓу нив имало лица од Тетово, Скопје, Куманово и од Косово, а брзо биле пронајдени со брза интервенција на полицијата од Полициското одделение на Попова Шапка и вработените на ЕЛЕМ Турс.
„Денеска во 10 часот и 30 минути, двајца тетовци на возраст од 15 и 19 години, во СВР Тетово пријавиле дека поради неповолните временски услови и густата магла на Попова Шапка, во близина на новиот ГЕ ски-лифт, каде се искачиле да скијаат, се изгубиле и потоа не знаеле каде точно се наоѓаат. Полициски службеници од Полициското одделение Попова Шапка и екипи од Елем Турс веднаш презеле соодветни мерки за нивно пронаоѓање и ги пронашле двајцата тетовци, како и 7 други лица од Скопје, Куманово и соседно Косово кои, исто така, се изгубиле во тој реон. Деветте лица на возраст од 15 до 45 години, околу 12 часот и 30 минути се безбедно вратени“, соопшти портпаролот на СВР Тетово Марјан Јосифовски.
З. АНДОНОВ
