Петнаесет повредени лица се примени во две клиники по невремето што попладнето го зафати Скопје, од кои девет на Kлиниката за трауматологија, ортопедски болести, анестезија, реанимација, интензивно лекување и ургентен центар (ТОАРИЛУЦ), а шест на Клиниката за хируршки болести „Св. Наум Охридски“ во Скопје.
Дебар Маало, веднаш по невремето (Фото: СДК.МК)
Центарот за управување со кризи (ЦУК) вечерва соопшти дека во периодот од 17:00 до 21:00 часот беа примени повеќе од 8.300 повици на Единствениот број за итни случаи 112 во Центарот.
Управата за хидрометеоролошки работи (УХМР) објави дека невремето во Албанија и Косово во моментов се движи кон Македонија и дека ова невреме можно е да биде со поизразени врнежи, а не ветер. Во Скопје е можно ново невреме околу 23 часот вечерва.
Паднато дрво пред основното училиште „Вера Циривири – Трена“ во Карпош 2, на улицата зад Машинскиот факултет (Фото: СДК.МК)
Директорот на Клиниката за ТОАРИЛУЦ, проф. д-р Игор Мерџаноски за МИА изјави дека од деветте повредени, две се со потешки повреди – една жена со повреда на глава е на Неврохирургија, а друга е со скршена рака.
Повеќе десетици дрвја откорнати во градскиот парк – просторот помеѓу Градскиот стадион и стадионот на АРМ кадешто падна бината на која требаше да се одржи концерт на отворено на британската пејачка Џес Стоун (Фото: СДК.МК)
Шесте повредени кои се примени на Клиниката за хируршки болести „Св. Наум Охридски”, како што изјави директорот д-р Небојша Настов, имаат посекотини и набиеници и се третираат амбулантски. Додаде дека тројца од повредените по амбулантскиот преглед, се пуштени дома, а тројца се во фаза на испитување.
„Сите се во стабилна состојба. Првично не оддаваат впечаток дека ќе бидат задржани на натамошно лекување. Еден пациент е повреден при пад на дрво и го закачиле гранките, еден е повреден од лим кој паднал од некој покрив, а еден е повредени од паднати керамиди“, додаде д-р Настов.
Директорот на Градската општа болница (ГОБ) „8 Септември“, д-р Синиша Стојаноски изјави дека кај нив не се примени повредени лица во невремето во Скопје, но е предизвикана огромна материјална штета во болницата. Кажа дека чекаат комплетен увид за да се утврди обемот на штетата.
(Фото: СДК.МК)
„Тоа ние денеска нема да го знаеме прецизно додека не излезе проценител на терен и не се направи официјален записник за штета од надлежните институции. Засега најголема штета имаме на кровот и кровната конструкција. Тоа е она што можам да го кажам од првичниот увид“, додаде д-р Стојаноски.
Од корен откорнато дрво на крстосницата на влезот на Градскиот парк спроти седиштето на градската локална власт (Фото: СДК.МК)
„Операторите на 112 работат во полн капацитет, а уште во првиот час беа ангажирани и дополнителни смени со цел да се одговори на зголемениот број повици. И во моментов сè уште има зголемен интензитет на повици од граѓаните, а сите примени пријави континуирано се процесуираат и се проследуваат до надлежните институции и служби. Ги замолуваме граѓаните за трпение и разбирање во услови на исклучително голем број повици. Доколку не успеат веднаш да воспостават контакт со 112, пријавите за материјални штети можат да ги пријавуваат и во текот на утрешниот ден, по што истите ќе бидат навремено евидентирани и проследени до надлежните служби“, изјави директорот на ЦУК, Мухамед Али.
Б. НЕСТОРОСКА
