Пожарот од косовска страна навлезе и на македонска територија и неколку дена е сè уште активен. Од пожарот во повеќето скопски населби се чувствува силен мирис на чад и непријатна миризба.

Директорот на Дирекцијата за заштита и спасување (ДЗС) Стојанче Ангелов вели дека овој пожар вчера е ставен делумно под контрола и денеска се очекува да биде изгаснат.

„Кога ветрот е неповолен скопјани чувствуваат непријатен мирис кој доаѓа од чадот од овој пожар. Но, тогаш кога на граѓаните ќе им замириса чад од овој пожар нека помислат на сите пожарникари и сите доброволци и екипи кои учествуваат во гасењето и секојдневно се лице в лице со огнот“, рече Ангелов.

На овој пожар, како што соопшти Центарот за управување со кризи (ЦУК), полицискиот хеликоптер интервенираше и на територијата на Косово во реонот на Хани и Елезит, давајќи им поддршка на косовските екипи кои учествуваат во гасењето.

Според ЦУК,  до 7.30 часот регистрирани се вкупно 30 пожари на отворен простор, од кои 6 се активни, 5 се под контрола и 19 се изгаснати.

Активни пожари има во Општина Ѓорче Петров, село Грачани и село Никиштани – пожарот е активен и на територијата на Република Косово и гори шума.

Во Општина Македонски Брод, село Белица, месност Кајорец гори нискостеблеста и мешана шума, пожари има и  Општина Чучер-Сандево, село Брест, Општина Кичево, село Кнежино и село Добреноец, Општина Кичево, село Тајмиште, место викано Дарда, а  во Општина Ново Село пожар има во село Стиниќ.

А. АНТЕВСКА