Актуелните градоначалници на Општините Центар, Горан Герасимовски, на Чучер-Сандево, Сашо Комненовиќ, на Крива Паланка, Сашо Митовски, на Росоман, Стојанче Николов, и на Крушево, Томе Христовски, се меѓу 19-те кандидати за градоначалници на СДСМ за престојните Локални избори, што ги соопшти лидерот Венко Филипче. На оваа листа го нема актуелниот градоначалник на Струмица Костадин Костадинов.
Одлуката се однесува на првите 19 кандидати за градоначалници, ја донесе Извршниот одбор на партијата, а ја соопшти Филипче.
Останатите кандидати се: За Општина Аеродром, д-р Александар Трајановски, за Ѓорче Петров претседателот на општинската организација, Костадин Ацески, за Берово, актуелниот претседател на општинската организација Илија Рунтевски, за Лозово, Ацо Велковски, за Чешиново-Облешево, Горанчо Крстев, за Богданци, Блаже Шопов, Општина Дојран, Ристо Џинев, Општина Могила Зоран Ристевски, Општина Неготино, Петар Мантев, Општина Новаци, Општина Вевчани, претседателот на општинската организација Стефан Радиноски, за Ресен, претседателот на општинската организација Александар Бузлевски, за Штип претседателот на општинската организација Павел Иванов, за Гази Баба претседателот на општинската организација Влатко Митовски.
„Во тие општини завршија внатрепартиските постапки, роковите се завршени во однос на кандидирањето и оваа согласност понатаму на крајна одлука ќе ја доставиме до Централниот одбор на партијата тогаш кога ќе комплетираме сите општини. Овие кандидати се избрани врз основа на принципите коишто ги наведовме дека ќе важат за кандидирањето на овие луѓе. Избрани се со прилично широк консензус во општинските организации, луѓе кои што имаат и кредибилитет и легитимитет да ја побараат довербата, некои за првпат, некои повторно од граѓаните. Актуелните градоначалници коишто навистина направија вистинска промена во општините: во Центар, во Крушево, во Крива Паланка – Општини и градови коишто станаа целосно нови во времето на нивните мандати, и сметам дека се луѓе кои што можат да излезат пред граѓаните и може слободно да кажеме дека сè што ќе ветат ќе биде исполнето согласно нашата програмска заложба, која што ќе биде градена врз основа на вредносните принципи“, рече Филипче.
