„Вевчански ковид сертификат“, „Летаме за ЕУ“, но и традиционалните „Зетот и невестата“, „Глупавиот август“ и „Музичарите“ се само дел од маските кои денес продефилираа низ Вевчани, со што жителите го одбележаа традиционалниот Вевчански карневал стар со векови. Не беше одминат ни случајот „Енергетска криза“, а се вееше и Европското знаме.

(Фото: Ѓ. Личовски)

Вевчанци на свој начин ги исмеаја и политичарите. Во карневалската поворка се најдоа „Ангели нацисти“ и „Кастриот Реџепи“.

Градоначалникот Спасе Кочовски кажа дека убавината на карневалот е токму во хуморот и сатирата.

(Фото: Ѓ. Личовски)

„Василичарите ја прикажуваат годината онаква каква што била со сите позитивности и негативности во неа. Не треба да бидеме суетни. Тоа се маски кои не сакаат никого да навредат или повредат, не будат никакви национални или верски чувства“, вели Кочовски.

(Фото: Ѓ. Личовски)

Вевчанци со карневалот ја слават Стара Нова година, со маските и ритуалите се обидуваат да го избркаат злото. Прославата продолжува вечерва со концерт на Перо Бели, Елена Јовчевска, Сања Ристеска и Дамјан Стојаноски, а точно на полноќ традиционално со огномет вевчанци ќе ја дочекаат православна Нова година. Карневалот завршува утре со последното василичарско оро и ритуалното палење на маските.

С. ВРЕНЦОВСКА