Неколку лица на возраст од околу 40 години кои досега немале хронични болести се на лекување во Ковид-центарот во Клиничката болница во Тетово. Освен ова, постојано се зголемува и бројот на амбулантските прегледи на Инфективното одделение што, според тетовските инфектолози, е знак дека бранот од заразата сѐ уште присутен и тие бараат понатамошно строго прчитување на мерките.
„Секој ден имаме по над 70 амбулантни прегледи. Секако, не се сите прегледани заболени со ковид-19 но, тоа е знак дека бранот најверојатно ќе трае уште неколку недели. За жал, деновиве имавме случаи кога се хоспитализирани и неколку млади лица на околу 40- годишна возраст кои немале некои коморбидитети, а се позитивни на вирусот. Поради ова, уште еднаш апелираме и понатаму многу да се внимава на мерките, посебно кај оние семејства каде има луѓе со хронични болести“, изјави д-р Гзим Нуредини, координатор во Ковид-центарот.
Во тетовската Клиничка волница засега има доволно болнички кревети за заразените со ковид-19, но како превентива, деновиве повторно проработи и вториот кат од Интерното одделение каде се примаа заболени во екот на најголемиот прилив на заразени во ноември и декември минатата година.
„Сега на болничко лекување имаме 35 пациенти поради што, после подолг временски период, повторно го отворивме и вториот кат од Интерно одделение за прием на ковид болни. Поради ова, моравме да направивме реорганизација, бидејќи ни требаа уште лекари и сестри, технички персонал, па тие беа повлечени од други одделенија кои во овој период имаат помал обем на работа“, вели д-р Нуредини.
Во кругот на болницата има модуларна монтажна болница која сѐ уште не се користи. Од Клиничката болница велат дека изградбата на објектот е во целосна надлежност на Министерството за здравство и само тие имаат информација кога оваа модуларна болница ќе биде пуштена во употреба.
З. АНДОНОВ
