Шест пријави за  труење со храна од вработени во фирма во трговско-индустриската (ТИР) зона во Штип се поднесени на 8 јули во Одделението за епидемиологија и социјални услуги при Центарот за јавно здравје.

„Стручни лица од Центарот излегоа на увид во објектот на операторот со храна каде бил извршен разговор со одговорните лица, биле дадени препораки и мерки, наложено било генерално механичко чистење на просториите и биле направени и санитарни прегледи на вработените и земени се мостри за микробиолошка анализа и брисеви од работните површини и во фирмата каде се консумира храната и кај операторот снабдувач со храна“, соопшти Центарот.

Отаму велат дека до добивањето на сите резултатите ќе се следи состојбата на веќе заболените лица и начинот на извршувањето на мерките и препораките, а според законската регулатива ќе се преземат дополнителни мерки ако има нови затруени.

Станува збор за вработени во една од првите фирми во ТИР зоната, а операторот е лоциран во кругот на поранешниот комбинат „Македонка“ во Штип.

Т. ЈОВАНОВСКИ