Најголемата казна за прекршок снимен со камерите на „Безбеден град“ е 500 евра,  казната е за учество во сообраќај со нерегистрирано возило или со истечена возачка дозвола. Ако истекот на сообраќајната дозвола е до 30 дена тогаш казната е 100 евра. Од Министерството за внатрешни работи (МВР) ги објавија казните за прекршоците одсистемот со камери „Безбеден град“ кој стартува од 1 февруари, откако на 23 јануари Собранието со 81 глас „за“ ги донесе измените на Законот за прекршоци,

• За пречекорување на брзина во населено место до 10 км/час над дозволеното казната е 15 евра, од 10 до 30 км/час 50 евра, а 300 евра плус забрана за управување со возило од три до 12 месеци ако се вози од 30 до 50 км/час над дозволеното.
• За пречекорување на брзина надвор од населено место односно на автопат до 30 км/час над дозволеното казната е 20 евра, од 30 до 50 км/час над дозволеното е 50 евра, а од д 50 до 70 км/час повеќе од дозволеното казната е 300 евра плус забрана за управување 3–12 месеци.
• За поминување на црвено светло казната е 250 евра плус забрана за управување 3–12 месеци.
• За непрописно запирање и паркирање казните се 25, 40, 150  и 180 евра односно зависи каде возилото е паркирано.
  

  МВР ги објави прекршоците и казните за „Безбеден град). (Фото: МВР)

Ако казната се плати во рок од 8 дена тогаш се плаќа 50% од глобата. Ако лицето има забрана за управување на возило казната се изрекува во половина од пропишаниот рок.

• ИЗГЛАСАНИ ПРЕКРШОЧНИТЕ КАЗНИ ЗА СТАРТ НА „БЕЗБЕДЕН ГРАД“, АГЕНЦИЈАТА ЗА ЛИЧНИ ПОДАТОЦИ ЗАСЕГА БЕЗ ГАРАНЦИЈА ДЕКА МВР НЕМА ДА ГИ ЗЛОУПОТРЕБИ СНИМКИТЕ
• ОД 1 ФЕВРУАРИ ЌЕ ПОЧНЕ КАЗНУВАЊЕТО ЗА СООБРАЌАЈНИ ПРЕКРШОЦИ СНИМЕНИ СО КАМЕРИТЕ НА „БЕЗБЕДЕН ГРАД“

Системот ќе функционира со фиксни камери, кои ќе регистрираат брзина на движење, поминување на црвено светло и нерегистрирани возила, а ќе биде дополнет со специјализирани полициски возила опремени со уреди за снимање, кои ќе се движат низ градовите и ќе документираат непрописно паркирање и други прекршоци.

Сопствениците на возилата за кои е утврден прекршок ќе добиваат СМС-порака и е-пошта со линк за преземање записник со платен налог. Прекршоците ќе можат да се платат електронски, а при навремено плаќање нема да се наплаќаат дополнителни трошоци. За одредени прекршоци, за кои е пропишана и забрана за управување со возило, МВР ќе поднесува барање за поведување постапка до надлежен суд.

 А. АНТЕВСКА