„Адвокатка“ на дебитантите Рејчел Леа Џонс и Филип Белаш освои Златен Александар и 8.000 евра на 21. Солунски фестивал на документарци што заврши синоќа. Филмот е за исклучителниот живот и кариера на Леа Цемел, која 50 години на суд е бранителка на Палестинци, и тоа без предрасуди – од феминистки до фундаменталисти, од ненасилни демонстранти до вооружени милитанти. Цемел беше фестивалското изненадување оти ненајавено дојде на премиерата на филмот.
Леа Цемел беше фестивалското изненадување оти ненајавено дојде на премиерата на филмот (Фото: Солунски фестивал)
„Адвокатка“ ја освои и наградата на критичарите ФИПРЕСЦИ.
Специјалната награда на жирито и 2.000 евра освои автобиографскиот документарец „Полноќен патник“ на авганистанскиот режисер Хасан Фазили, кој го документирал неговото бегство од Авганистан откако талибанците сакале да го убијат. Тој заедно со сопругата и двете мали ќерки морал да патува ноќе, низ непознати предели, и во филмот од прва рака ги покажува опасностите со кои се соочуваат бегалците.
Наградата на Амнести интернешенел ја осови „#Женско задоволство“ на швајцарската авторка Барбара Милер, која низ приказните на 5 жени од пет континенти го открива кршењето на нивните човекови права засноано само врз фактот дека се жени.
М. КОСТОВА
