„МЕДЕНА ЗЕМЈА“ МЕЃУ ПЕТТЕ НОМИНИРАНИ ЗА НАГРАДАТА НЕЗАВИСЕН ДУХ, ПРЕДВЕСНИКОТ НА ОСКАРИТЕ

    „МЕДЕНА ЗЕМЈА“ МЕЃУ ПЕТТЕ НОМИНИРАНИ ЗА НАГРАДАТА НЕЗАВИСЕН ДУХ, ПРЕДВЕСНИКОТ НА ОСКАРИТЕНаградите Независен дух ќе се доделат на 8 февруари во Санта Моника, Калифорнија - еден ден пред доделувањето на Оскарите, а „Медена земја“ е меѓу петте номинирани за најдобар документарец. (Фото: Продукција Медена земја)

    Документарецот „Медена земја“ на Тамара Котевска и Љубо Стефанов е меѓу петте номинирани за престижната американска награда Независен дух (Independent Spirit), која е предвесник на Оскарите. „Медена земја“ е номиниран за најдобар документарец заедно со „Американска фабрика“, „Аполо 11“, „За Сама“ и „Островот на гладни духови“.

    Единствениот македонски филм кој досега ја освоил наградата Независен дух е „Пред дождот“ на Милчо Манчевски, во 1995 за најдобар странски филм. „Пред дождот“ истата година беше и меѓу петте номинирани за Оскар.

    Оваа награда ја доделува Здружението на независните филмаџии на САД, номинациите ги селектира комитет од 50-на членови, а за наградите гласаат над 6.000 членови. Специфично е што се квалификуваат филмови кои се снимени за буџет не поголем од 22,5 милиони долари. Наградите ќе се доделат на 8 февруари во Санта Моника, Калифорнија – еден ден пред доделувањето на Оскарите.

    Хорор приказната „Светилникот“ и крими трилерот на Адам Сендлер „Небрусен дијамант“ имаат најмногу номинации за Независен дух 2020, по пет, а по четири имаат „Дај ми слобода“ и „Медено момче“. „Небрусен дијамант“, „Скриен живот“ на Теренс Малик, „Милостивост“ на Чинонје Чукву, „Збогум“ на Лулу Ванг и „Брачни приказни“ на Ноа Баумбах се меѓу номинираните за најдобар филм. Изминативе неколку години токму добитниците на Независен дух за надобар филм освоиле и Оскар во оваа категорија, затоа и наградите се сметаат за главен предвесник на Оскарите.

    „Медена земја“ е првиот документарец кој е македонски кандидат за Оскар во категоријата најдобар странски филм.

    Исто така, освoи и номинација за најдобар документарец за Европските филмски награди што ќе се доделат во првата недела на декември. Со оглед декаво јуни  победи на фестивалот Докавив во Тел Авив, се квалификува да биде номиниран за Оскар и во главната конкуренција за најдобар документарец, не само за најдобар странски филм. Со оглед на патеката за награди и номонации што досега ја минува во САД, шансите за номинација за Оскар се големи.

    Филмот пред десет дена освои две награди Избор на критиката за документарци во САД, за најдобар прв документарен филм за режисерите Тамара Котевска и Љубомир Стефанов и за најпривлечен лик во документарец за протагонистката Атиџе Муратова.

    По успешната кинодистрибуција во САД, неделава отвора и во кината во Германија и Данска.

    М. КОСТОВА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари