Проектот „Охрид In Situ – архитектура, континуитет и мудрост на местото“, на Здружението на граѓани за поддршка и промоција на културата „Континео“ од Скопје, ќе ја претставува Македонија на 20. Венециско биенале на архитектура во 2027 (8 мај-21 ноември), соопшти Министерството за култура и туризам. Проектот е дело на авторите Владимир Десков, Ана Ивановска-Дескова, Јован Ивановски, Харалд Трап и Симон Хартман, со соработниците Теа Дамјановска, Михајло Стојановски и Зоран Петровски. Куратор на проектот е Ивановски, а комесар е Авни Ќаили, директор на Музејот на современа уметност (МСУ) Скопје.
Министерството вели дека „Охрид In Situ – архитектура, континуитет и мудрост на местото“ е единствениот проект кој стигнал на конкурсот, и комисијата во состав Огнен Марина, Мишко Ралев и Рилинд Селмани, утврдилa дека ги исполнува утврдените конкурсни услови и критериуми.
„Проектот го истражува Охрид како простор во кој низ вековите се преплетуваат природата, топографијата, архитектурата, материјалите, градителските практики и секојдневниот живот. Посебен акцент е ставен на регионалниот модернизам од втората половина на 20. век и начинот на кој македонските архитекти го реинтерпретирале наследеното просторно искуство на Охрид“, вели Министерството.
Генералната тема на кураторите на 20. Венециско биенале на архитектурата Ванг Шу и Лу Венју е „Создавај архитектура – за можноста за соживот во соочување со реалноста“ („Do Architecture – For the Possibility of Coexistence Facing a Real Reality“).
