„Путиновите сведоци“ на Витали Мански ќе се прикаже вечерва од 20 часот во Кинотеката, во рамките на фестивалот Киненова. Самиот режисер ќе присуствува на проекцијата и потоа ќе одговара на прашањата од публиката.

Настаните во филмот почнуваат на 31 декември 1999, кoга во Русија беше избран нов претседател. Документарниот филм е заснован на уникатните документирани сведоштва за вистинските причини и последици од операцијата „Наследник“, по кои Русија го испрати во заборав својот дотогашен претседател Борис Елцин.

Главни протагонисти во филмот се Борис Елцин, Михаил Горбачов и Владимир Путин. Филмот на Мански е редок автентичен поглед на младиот Путин и на големата политичка машинерија која му помогнала да добие со огромна моќ.

„Сомнеж“, последниот филм на турската режисерка Јешин Устаоглу, ќе се прикаже од 18 часот, а на крајот на овој фестивалски ден е бразилскиот филм „Сократес“ на Алешандре Морато.