Музејот на современата уметност (МСУ) од Скопје доби специјално признание за креативност во рамките на наградата Жива за најдобар словенски музеј, соопшти Министерството за култура. Наградата ја доделува Меѓународната фондација „Форум на словенските култури“ со седиште во Љубљана, Словенија.

На свеченоста во Посавскиот музеј во Брежице, во името на МСУ, признанието го прими националниот претставник на земјава во „Форумот на словенски култури“, Гордан Николов.

„Новиот поттик што Музејот го дава на широката дисеминација на уметничките колекции и на важноста на современото уметничко изразување, демонстрира напредок и натпреварувачки дух со интензивно инвестирање во трансформацијата на неговиот просторен капацитет и презентација на колекциите и општествено одговорните проекти.  Музејот успеа да создаде културна платформа за уметничка современа продукција – национална и меѓународна, промоција и истражување на сегашноста и идентитети кои служат за обележување на промените во времето“, стои меѓудругото во одлуката на жирито.

Б. НЕСТОРОСКА