Деведесет и деветгодишен ветеран на Втората светска војна кој собираше средства за Британската здравствена служба (НХС) така што шеташе во својата градина ѝ се заблагодари на јавноста откако донациите достигнале до 12,2 милиона фунти.

Капетанот Том Мур планираше да изоди сто 25-метарски кругови пред да наполни 100 години на 30 април и кога почнал, целта му била да собере 1.000 фунти за НХС. До денеска наутро, кога го комплетираше предизвикот, тој успеал да собере 12 милиони фунти, испратени од преку 700.000 луѓе.

Неговата страница за донации „JustGiving“ дури се урнала вчера кога во исто време сакале да ѝ пристапат 90.000 луѓе. Мур вчера објави дека била надмината сумата од пет милиони фунти.

„Не можам да верувам! Им благодарам на сите кои ја поддржаа Британската здравствена служба, таа го заслужи секое пени. Одзивот беше огромен. Кога почнавме, никој не можеше да го замисли ова“, изјави Мур.