„Алкалоид“ реализираше 178 нови вработувања во земјава, инвестиции од над 850 милиони денари и консолидирани продажби од 9,45 милијарди денари во периодот јануари-септември 2021.
Според единечниот биланс на успех, во периодот јануари-септември 2021 продажбите достигнуваат 7.165.890.933 денари, што е 4% повеќе во споредба со истиот период лани. Вкупните консолидирани продажби достигнуваат 9.449.288.430 денари, што е раст од 6%.
Консолидираните продажби на домашниот пазар се зголемени за 6%, а и вкупниот консолидиран извоз на компанијата е зголемен за 6%. Од вкупните консолидирани продажби, 65% се остварени на странските пазари, најмногу во Југоисточна Европа (33 %) и во Западна Европа (19). Најголем пораст бележат продажбите остварени во Германија (123%), Полска (92%) и Русија (52%). Првпат во сегментот фармација се реализираа продажби во Австрија, Португалија и Кипар, а во сегментот козметика се реализираше првата поголема продажба на колекцијата „Бекутан“ во Саудиска Арабија.
Гледано според групи производи, најголемо учество во продажбите заземаат производите од сегментот фармација, 87%.
Вкупните инвестиции во основни средства во периодот јануари-септември 2021 изнесуваат 850.639.878 денари.
Единечната добивка пред финансиските трошоци, даноците и амортизацијата (ЕБИТДА), која изнесува 1.687.034.470 денари, бележи зголемување од околу 14%, додека единечната нето добивка изнесува 978.479.923 денари и е зголемена за 16%. Консолидираната добивка пред ЕБИТДА достигна 1.766.595.559 денари (раст од 14%), а консолидираната нето добивка изнесува 989.201.826 денари и е зголемена за 17 %.
Во периодот јануари-септември 2021 во „Алкалоид“ се реализирани 178 нови вработувања во Македонија. Групацијата „Алкалоид“ брои 2.511 вработен, од кои 1.933 во базата во Скопје, а 578 во подружниците во странство.
Акциите на „Алкалоид“ АД Скопје котираат на Македонската берза за хартии од вредност од 2002 година. Цената на акцијата во периодот јануари-септември 2021 се движеше од 13.300 до 18.350 денари или просечно. 15.272,83 денари за една акција, што претставува раст од 26,5% во споредба со просечната цена во истиот период во 2020.
