Најголемите германски автопроизводители „Дајмлер“, „Мерцедес“ и „Фолксваген“ ги осудија научните експерименти, во коишто намерно изложиле мајмуни на токсични дизел гасови.
Тие ја искористиле Европската истражувачка група за околина и здравје во транспортниот сектор, позната како ЕУГТ, за да спроведат студија, која требала да ја одбрани употребата на дизелот, откако се утврди дека тој создава издувни гасови кои се канцерогени.
„Њујорк тајмс“ објави дека ЕУГТ преку еден институт во Албукирки (САД) организирал експеримент, при што мајмуни биле затворени во просторија и вдишувале гасови од „фолксваген буба“. ЕУГТ притоа бил целосно финансиран од овие три компании.
„Групацијата ‘Фолксваген‘ се дистанцира од сите форми на мачење на животни. Тестирањето врз животни е спротивно на нашите сопствени етички стандарди. Се извинуваме за однесувањето и за недостиг на осуда од страна на поединци“, се вели во соопштението на компанијата, а слично реагираа и од „Дајмлер“ и од „Мерцедес“.
Студијата, која според „Њујорк тајмс“ почнала во 2014, завршила на 30 јуни 2017 година и нејзините резултати никогаш не биле објавени.
