Рекордно ниските температури во Финска оваа недела инспирираа турист на патување на Арктикот да испроба трик што долго време го интригирал: фрлање врела вода во воздух кога надвор е екстремно студено и гледање како таа се претвора во моментален облак од ледена прашина. Ова не е нешто што треба да се прави, освен ако температурите не се на ниво на студ што ретко или никогаш не се случува на повеќето места на Земјата.
Лаури Унтамо, 49-годишен менаџер за продажба од јужна Финска, бил на одмор во финска Лапонија со пријателите кога температурата паднала на минус 30 степени Целзиусови на Нова година.
„Ги видов видеата од трикот на социјалните мрежи или Јутјуб, но никогаш немаше соодветен студ за да го пробам на минус 30 степени или повеќе“, изјави Унтамо.
Тој рече дека зоврил вода во неговата барака, брзо ја изнел надвор и ја фрлил во лак над главата, а го преживеал обидот без изгореници бидејќи водата веднаш се претворила во леден облак.
Нордиските земји имаа екстремно студено време изминатите неколку дена, со најниска температура во последните 25 години од минус 44,3 Целзиусови забележана во петокот во Енонтекио, посеверно на Арктикот од Пјатунтури, каде што престојуваше Унтамо.
И покрај студот, Унтамо и неговата група пријатели уживаат во активности на отворено, како што се нордиско скијање и шетање во шумите покриени со снег.
„Видовме дури и Аурора бореалис неколку ноќи, така што Лапонија навистина ни го даде најдоброто од себе оваа недела“, рече тој.
