Американската полиција лови 43 мајмуни кои избегале од истражувачка лабораторија во Јужна Каролина откако чувар ја оставил отворена вратата од нивното надворешно живеалиште. Мајмуните од видот макаки-резус избегале од компанијата „Алфа џенезис“ која одгледува примати заради медицинско тестирање и истражување.

Властите им порачаа на локалните жители да ги држат вратите и прозорците затворени, додавајќи дека избеганите мајмуни се млади женки со тежина од над три килограми.

„Компанијата ја лоцираше групата скитници и се обидува да ги намами со храна. Не им се доближувајте на животните под кои било услови“, објави полицијата, додавајќи дека низ областа се поставени стапици.

Од компанијата ѝ рекле на полицијата дека мајмуните се премлади за да бидат носители на болести и дека врз нив досега не биле вршени тестирања.

„Од 50-те мајмуни, само седум не избегаа. Се надеваме на среќен крај и дека сами ќе се вратат кај нас“, изјави Грег Вестергард, извршниот директор на „Алфа џенезис“.

Мајмуните макаки се познати како агресивни, но Вестергард уверува дека нема опасност за јавноста.