Првата прошетка на женски екипаж во вселената во 61-годишната историја на НАСА конечно треба да се случи утре.

Астронаутките Кристина Кох и Џесика Меир требаше да излезат од Меѓународната вселенска станица на 21 октомври, но нивната историска екскурзија беше поместена за три дена порано. Задачата на Кох и Меир ќе биде да го заменат уредот за полнење батерии, на кој се појавија проблеми оваа недела.

„Вселенската прошетка на Кох и Меир најрано ќе се случи в петок“, напишаа вчера од Меѓународната вселенска станица на Твитер.

Според НАСА, прошетката би требало да трае околу пет и пол часа. Тие ќе заменат регулатор за енергија, кој беше во функција од 2000 година, но не се активираше откако неодамна беа ставени нови литиум-јонски батерии.

Кетрин Саливен во 1984 година стана прва жена која излегла во вселенска прошетка и иако оттогаш тоа го направија уште 14 астронаутки, тие секогаш биле придружувани од машки колега.