287 ДЕЦА СО ПОПРЕЧЕНОСТ КОИ ОДАТ НА УЧИЛИШТЕ ДОБИЈА СТИПЕНДИИ ОД МИНИСТЕРСТВОТО ЗА ОБРАЗОВАНИЕ

    287 ДЕЦА СО ПОПРЕЧЕНОСТ КОИ ОДАТ НА УЧИЛИШТЕ ДОБИЈА СТИПЕНДИИ ОД МИНИСТЕРСТВОТО ЗА ОБРАЗОВАНИЕМинистерката Царовска на денешното одбележување на почетокот на проектот „Биди ИН, биди ИНклузивен, биди ИНклудиран“, на Фондацијата за образовни и културни иницијативи „Чекор по чекор“ во соработка со Здружението за промоција и развој на инклузивно општество „Инклузива“ и Здружението за давање услуги на лицата со попреченост „Хендимак“. (Фото: МОН)

    Двесте осумдесет и седум деца со попреченост кои се запишани оваа учебна година во прво и второ одделение, добија стипендии од Министерството за образование и наука (МОН).

    „Со тоа се поттикнува запишувањето на учениците со попреченост во редовното образование и се поддржува инклузивното образование за секое дете“, рече министерката за образование и наука Мила Царовска на денешното одбележување на почетокот на проектот „Биди ИН, биди ИНклузивен, биди ИНклудиран“, кој го реализира Фондацијата за образовни и културни иницијативи „Чекор по чекор“ во соработка со Здружението за промоција и развој на инклузивно општество „Инклузива“ и Здружението за давање услуги на лицата со попреченост „Хендимак“.

    Проектот овозможува и туторска поддршка на овие деца, со што 30 тутори кои помина низ процес на обука ќе им даваат дополнителна поддршка на децата во совладување на наставната содржина.

    „Инклузивното образование е процес со кој треба да излеземе во пресрет и да одговориме на различните потреби на учениците, преку обезбедување на пристапност, соодветна поддршка, зголемување на нивното учество во учењето, во училиштето и во заедницата. Сето тоа вклучува разумно прилагодување на образовните содржини, соодветни наставни приоди и организација на воспитно-образовниот процес, за да се овозможи квалитетно образование за секое дете. Тоа истовремено значи и промена на нашите ставови, промена на ставовите во заедницата, но и на општеството во целина, дека сите сме еднакви, но дека имаме различни потреби“, изјави Царовска.

    МОН го донесе Упатството за начинот на соработка помеѓу основните училишта со ресурсен центар, центрите за поддршка на учењето и другите основни училишта, со кое се регулира начинот на поддршка, роковите и начинот на финасирањето на поддршката.

    Министерката Царовска кажа дека е спроведена анкета со сите посебни училишта и училишта кои имаат посебни паралелки, а кои треба да продолжат да функционираат како ресурсни центри и центри за поддршка, со цел да ги согледа нивните моментални капацитети и да се подготви план за реонизација, односно да ја определи територијата за обезбедување на поддршката.

    „Во финална фаза се подготовките за услугата од образовна асистенција, што ќе се испорачува согласно Законот за основно образование и ќе се финансира од Буџетот на МОН за 2021 . Исто така, во тек е реализацијата на Проект за непречен пристап во 12 образовните институции низ државата – 4 основни училишта, 4 средни и 4 факултети преку Акциската програма на 2019-ИПА 2 – ЕУ фор инклужн, а градежните активности треба да почнат во првата половина на 2021“, велат од МОН.

    На денешниот настан, евроамбасадорот Дејвид Гир рече дека преку овие стипендии се поттикнува инклузивноста на лицата со попреченост.

    „На овој начин се бориме против дискриминацијата, ја промовираме еднаквоста и го подобруваме пристапот до образование”, рече Гир.

    Б. НЕСТОРОСКА

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира