815 ЗАТВОРЕНИЦИ ЌЕ БИДАТ ОПФАТЕНИ СО ЗАКОНОТ ЗА АМНЕСТИЈА

    815 ЗАТВОРЕНИЦИ ЌЕ БИДАТ ОПФАТЕНИ СО ЗАКОНОТ ЗА АМНЕСТИЈААмнестијата ќе се однесува за лица кои делата на амнестијата ги сториле до 20 септември 2017 година. - Затворот во Идризово (архивска фотографија)

    Со предложениот закон за амнестија ќе бидат опфатени 815 осудени лица кои издржуваат казна затвор, вели директорот на Управата за извршување на санкции Јовица Стојановиќ.

    „Со амнестијата ќе се релаксира состојбата во затворите. Имаме стратегија за подобрување на условите во затворите. Во тек е јавна набавка за нови 546 легла за затворот Идризово и 110 легла за затворот Тетово. До мај планираме да ги вселиме новите одделенија. Од Агенцијата за управување со одземен имот добивме 7 возила за превоз на затвореници“, вели директорот Стојановиќ.

    Законот за амнестијата ќе се однесува на лица осудени со правосилна пресуда затвор за кривични дела пропишани со Кривичниот законик или други закони. Со амнестија ќе бидат опфатени следниве осудени лица кои се наоѓаат на извршување казна затвор:

    • осудени лица со казна затвор со шест месеци потполно ќе бидат ослободени од извршување на казната
    • осудени лица на кои им е изречена казна затвор над 6 месеци, се ослободуваат од издржување на казната за 30 отсто
    • осудени лица на кои им е изречена единствена казна затвор, се ослободуваат од издржување на казната за 30 отсто
    • доколку во единствената казна затвор е утврдена казна затвор за кривично дело кое не подлежи на амнестија, осуденикот ќе се ослободи од издржување на казната за 30 отсто само во делот на претходно утврдените поединечни казни опфатени со амнестијата.

    Амнестијата не се однесува на лица осудени во правосилна пресуда:

    • на казна доживотен затвор
    • за кривично дело Убиство од член 123 од Кривичниот законик
    • кривични дела против избори и гласање член 156-165-в од Кривичниот законик
    • за кривични дела против половата слобода и половиот морал од членовите 186,187, 188, 189, 191, 193, 193-а, 193-б и 194 од Кривичниот законик
    • за кривични дела против државата член 305-327 од Кривичниот законик
    • за кривични дела против јавниот ред член 394-а-394-г од Кривичниот законик
    • за кривични дела против човечноста и меѓународното право член 403-418-а и од 418-в до 422 од Кривичниот законик

    Амнестијата ќе се однесува за лица кои делата на амнестијата ги сториле до 20 септември 2017 година.

    Владата го разгледа и усвои Предлог-законот за амнестија на седница минатата недела. Во предлог законот се вели дека донесувањето на законот за амнестија има за цел да се овозможи процесот на ресоцијализација и социјална реадаптација на осудените лица. Во собраниска процедура ќе влезе по редовна постапка.

    А. АНТЕВСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари