Ако 25 години битолчани живееле без чист воздух, веројатно и Македонија ќе поживее малку и без електрична енергија, велат борците за чист воздух од Битола. Од здружението „За нас се работи“ не ја исклучуваат можноста да ги радикализираат протестите и блокадите ако политичките партии не го потпишат меморандумот со кој бараат режим на сообраќајот во центарот на градот и субвенционирање на електричната енергија. Денес беше трет ден како го блокираат патот кон РЕК и влезот на Битола од страната на Прилеп. На протестите имаше и деца.

„Заедно ќе одлучиме што понатаму. Веројатно, Македонија ќе може да поживее малку и без електрична енергија. Има луѓе кои се јавија овие денови, кои се справуваат со болеста на своите деца, ги гледаат во постела и ги носат на хемотерапија во Скопје. Ова е елементарна непогода и крајно време е да почнеме да ја решаваме“, изјави Дуле Груевски од „За нас се работи“.

Сепак, и денес повеќе битолчани имаше на панаѓурот со стока од Шутка, отколку на протести.