71 припадник на Армијата на Република Македонија денеска беа испратени на големата воена вежба „Сејбр гардијан 2017“, на која што учествуваат 25.000 припадници на вооружените сили на 22 земји, а ќе се одвива на териториите на Романија, Унгарија и Бугарија, соопшти Министерството за одбрана.
„На ’Сејбр гардијан 17’ нашите учесници ќе покажат дека македонската армија и нејзините припадници навистина можат да учествуваат заедно со земјите-членки на НАТО и земјите-партнери во сериозни и комплексни вежбовни активности“ изјави министерката за одбрана Шекеринска на свеченото испраќање.
Таа додаде дека вежбата претставува одлична можност за извежбување на вооружените сили на земјите-учеснички во смисла на зајакнување на подготвеноста и подобрување на интероперабилноста под заедничка команда, извршувајќи целосен спектар на воени мисии, а во насока на поддршка на безбедноста и стабилноста на Црноморскиот регион.
