Министерство за правда денеска на владината седница го доставило мислењето за работата на Државниот обвинител Љупчо Коцевски, во кое, според портпаролката Марија Митева, бил нотиран нарушен углед на институцијата со која раководи Јавниот обвинител, спротивно на член 4 став 1 од Законот за Јавно обвинителство.
„Натаму, целокупната јавност во изминатиов период беше сведок на низа скандали, нарушена функционалност на Јавното обвинителство, незаконски постапувања и корупција, неефикасност и повреда на принципите и самостојноста во вршењето на функциите на обвинителите. Ваквите состојби се комплетно спротивни на обврските кои произлегуваат од законските надлежности. Овде не станува збор само за перцепција само на Владата, ова е констатирано од стручна јавност, констатирано е во извештаи кои имаат конкретни, мерливи и објективни показатели“, кажа Митева и пренесе дека Владата цени оти придонесот од Јавниот обвинител за овие состојби бил значителен и е резултат на низа пропусти и повреди во неговото постапување и извршување на функцијата.
Без да посочи конкретна дисциплинска грешка, односно повреда, Митева рече дека „овие дејствија со кои се предизвикани тешки последици по функционирањето на Јавното обвинителство, со што е направено намерно и неоправдана крупна професионална грешка“ се правните аргументи со кои Владата ќе побара разрешување на Јавниот обвинител пред истекот на мандатот.
Согласно вака утврденото мислење, Владата го задолжи Министерството за правда да достави предлог за разрешување на Јавниот обвинител Љупчо Коцевски.
Владата ќе го достави предлогот до Советот на јавните обвинители од каде, согласно законските одредби, потребно е да се добие мислење. Советот треба за 15, а најдоцна за 30 дена треба да врати мислење до Владата, дали се согласува и зошто не.
Разрешувањето Државен јавен обвинител сега е многу тешко, но само за да се спречи упад во работата на органот на гонење криминал. Овие 34 години од самостојна Македонија, која власт како се менува, прво што прави е смена на Државниот обвинител и ставање свој човек. Од пред околу 5 години ставена е бариера, па сега за да се разреши Јавниот обвинител на Македонија, потребно е да се докаже крупна дисциплинска повреда на законот или тој да е член на политичка партија, што кај Коцевски, барем од она кое Владата го покажува на јавноста, не е случај.
Сè друго е насилна смена на обвинителот и упад во правосудниот систем од извршната власт.
Од друга страна, состојбата со борбата со организираниот криминал и корупција е катастрофална, но за тоа не се бара вина ни во Обвинителството за организиран криминал и корупција, ни во Вишите јавни обвинителства, и воопшто меѓу обвинителите во Републичкото јавно обвинителство.
Најважно е дека секоја власт се фаќа прво за разрешување и кратење пари за Обвинителството, а ниту една не сака да одвои повеќе средства и услови за борба против криминалот. За среќа, странските амбасади ги помагаат обвинителствата и ги опремуваат.
Паралелно со барањето законска подлога за смена на Коцевски, надлежен јавен обвинител од Основното јавно обвинителство (ОЈО) Штип денеска спроведе увид во Вишото јавно обвинителство во Скопје, чиј шеф Мустафа Хајрулахи е под дисциплинска постапка, под истрага е и оддалечен е од работното место, исто како и неговиот заменик Јове Цветановски. ОЈО Штип, како неутрално и обвинителство вон Скопје, врши увид во рамки на истрагата за кривични дела Злоупотреба на службената положба и овластување, како и Малтретирање во вршење на службата, поведена против Мустафа Хајрулахи.
Додека ова трае, место да се почека да се истражат тие тврдења за Хајрулахи, него власта го користи за пресметка со Коцевски.
Обвинителот од Штип, заедно со стручни соработници од ОЈО Штип, детално ги анализирале и документирале податоците внесени во уписниците, како и начинот на распределба на предметите. При увидот била направена споредба со исказите на оштетените лица, кои тврделе дека имало неправилности и интервенции во распоредувањето на предметите.
„Сите собрани докази се обезбедени во согласност со Законот за кривична постапка, а за извршениот увид ќе биде составен официјален записник со констатации за присутните лица. Истрагата продолжува, а обвинителството најави дека ќе ги преземе сите законски мерки за целосно расветлување на случајот“, најави денеска Коцевски.
С. К. ДЕЛЕВСКА
