Единицата за боење одвај дочека знак за старт, го бои Собранието. Вечерва повторно е активиран изумот чатал со тегнало. Главниот бојаџија прави спектакл од боењето. За да ги истегне повеќе тегналата, легнува на асфалтот. Балоните пак без грешка ја погодуваат фасадата на Собранието.

Во исто време во паркот „Жена-борец“ демонстранти со маски на лицата напишаа „Шарам слобода барам“ на споменикот на бранителите, а други пак со молерски ваљак на асфлтот пред Собрание напишаа „Не можете да ја избришете шарената револуција“.

Револуционерите и вечерва со пуштање бомби од опозицијата потсетија на изборните нерегуларности пред Собрание. Оганизаторите во говорите најавија долга борба.

„Ќе протестираме од 5 мај до крај, ние ке побдиме. Власта успеа да не изненади со глупост, да бетонира диктатура со еднопартиски избори“, рече еден од говорниците.

„Кога ние бунтуваме тогаш тоа е насилство и хулиганство, а кога тие крадат тогаш тоа е бизнис и лидерство. Аболицирани политичари не може да градат правна држава, нема да дозволиме вакви политичари да бидат огледало на нашата држава“, порача говорникот.

Од Собрание демонстрантите ќе се движат кон Министерството за надворешни работи, а потоа кон Влада.

„Еднопартиски избори не може“ е централниот транспарент со кој вечерва антивладините демонстанти тргнаа кон Собрание. На зборното место, пред Специјалното јавно обвинителство (СЈО) како да има натпревар за инвентивност. Демонстрантите дојдоа со слики од Никола Груевски на кои пишува „Рајската градина го доби првиот мајмун“ или  „Готов сум“, а има и слики од Ѓорге Иванов на кои пишува „Закрпи се Хорхе“.

Шарените го почнаа маршот кон Собрание со порака дека не се откажуваат од борбата. „Ние ја одбираме улицата и затоа ви порачуваме: раскомотете се, ова ќе биде пеколно лето! Протестирам полека ќе станува блокирам, окупирам и секојдневно го менувам системот“, порачаа демонстрантите.

Шарената револуција и преку вечерашниот протест бара од Собранието да ја поништи одлуката за одржување на изборите на 5 јуни.

„Собрание, собери се! Шарената револуција бара итно поништување на одлуката за одржување на изборите на 5 јуни. Бараме итно поништување на одлуката за одржување избори на 5 јуни и итно поништување на одлуката за аболиција на оние против кои е поднесено обвинение од страна на СЈО“, пишува на страницата на Шарената револуција на Фејсбук.

Граѓаните од Шарената револуција бараат и оставка од Иванов, формирање специјално одделение на Кривичниот суд надлежно за случаите на СЈО и формирање преодна влада која докрај ќе ги имплементира итните реформски приоритети од извештајот на Прибе.

Протести има и во Велес, Крива Паланка, Берово, Делчево, Штип, Струмица, Кавадарци, Радовиш, Демир Хисар, Битола, Ресен и Прилеп.