При престојување подолго време во затворена просторија да се носат маски, а лицата од ризичните категории – постарите, лицата кои имаат една или повеќе хронични болести и сите кои имаат намален имунитет поради која било причина – да носат маска минимум ФПП2 или Н95 или ФФП3, препорачува Комисијата за заразни болести поради зголеменото пренесување на коронавирусот во земјава и зголемениот број новоозаразени.

„Просториите во кои се престојува подолго (канцеларии, занимални во градинки, сали за состаноци и слично), како и спортски објекти, редовно да се провертуваат и да се дезинфицираат. Да се избегнува непотребно собирање во големи групи и секогаш кога може да се одржува растојание од два метра. Редовна хигиена и дезинфекција на раце, особено ако кивате и кашлате, а устата ја покривате со дланката наместо со внатрешноста од лактот, како што е препорачано. Доколку почувствувате некои од стандардните симптоми (сува кашлица, температура, болки во грло, болки во мускулите и слично) веднаш побарајте помош од вашиот матичен лекар и задолжително носете маска“, велат од Комисијата.

Во моментов, задолжително е носење маски во јавен превоз, здравствени установи, аптеки и домови за стари лица.

Изминатава недела постојано расте бројот на новозаразени и веќе дневно е  над 36 отсто од тестираните, а за една недела бројот на болни в болница порасна од 10 на 28. Според вчерашната статистика, во моментов има 2.490 болни.

Од Комисијата велат дека во здравствените домови во земјава веќе е зголемен бројот на термини за тестирање на ковид-19, а во здравствените домови во Скопје тестирање се врши во пет пункта. Укажуваат и дека најефикасна заштита од развој на потешки форми на ковид и хоспитализација останува вакцинацијата, и апелираат да се вакцинираат сите оние кои не се вакцинирале или не го завршиле целиот вакцинален циклус (две дози плус бустер), а на оние кај кои поминале четири месеци од бустер дозата им се препорачува и второ бустирање.

„Во услови на регионална и светска експанзија на вирусот, колку поголема лична одговорност покажеме, толку поголеми се шансите овој бран и поединечно и колективно полесно да го поминеме, односно да не дојдеме во состојба да мора повторно да се активираат некои мерки, а што е веќе случај во некои држави“, велат од Комисијата.

Ж. ЗДРАВКОВСКА