Министерот за Европа во германското МНР Михаел Рот денеска кажа дека неговата влада е подготвена да ги поддржи Македонија и Албанија на патот кон ЕУ и ги повика Франција и Холандија да го направат истото.

„Германската Влада е подготвена да ги поддржи Македонија и Албанија на нивниот пат кон ЕУ. Подготвени сме да дадеме зелено светло и би сакал да ги охрабрам и нашите пријатели во Холандија и Франција да ни се придружат“, рече Рот пред денешниот состанок на Советот за општи работи во Луксембург.

На новинарско прашање дали очекува тоа да се случи денеска, Рот вели дека не е сосема сигурен, но оти се надева дека ќе се случи и оти е воздржан оптимист и додаде дека стабилноста, мирот и демократијата на Западен Балкан е клучна за сите во ЕУ.

„Затоа високо ги цениме напорите што ги преземаат и Македонија и Албанија за зајакнување на владеењето на правото, независно судство, борбата против корупцијата“, рече Рот.

Советот на ЕУ за општи работи денеска во Луксембург треба да донесе одлука по препораката на Европската комисија за почеток на пристапните преговори на Македонија и Албанија.