Дефинитивно е можно воведување рестрикции поради ширењето на ковид-19, но засега не, рече денес министерот за здравство Венко Филипче за растот на бројката новозаболени и хоспитализирани пациенти. После подолг период, вчера 21 отсто од тестираните биле позитивни, односно 725 луѓе, а се полнат и болничките капацитети. Вчера имаше 410 слободни места во Ковид-центрите.
„Навистина има зголемување кај бројката на новозаболени. Во МАНУ траат испитувањата, но вчера разговарав со лабораторијата во ‘Жан Митрев’, и таму кај 70 отсто од примероците е детектиран британскиот сој на вирусот, за кој се покажа дека побрзо се шири. Што се однесува до болничките капацитети, има места и во секој момент е спремен персоналот и за ротации. Ја следиме ситуацијата да не дојде до степен да го загрози здравствениот систем“, рече министерот на промовирањето на донација за Здравствен дом Скопје.
За вакцините против ковид-19, на синоќешната владина седница е усвоен нацрт-договорот за набавка на 100.00 дози од руската вакцина „спутник“, a деновиве ќе се очекува да стигне одговор кога би стигнале кинеските вакцини и вакцините на „Фајзер“.
На новинарско прашање на што се должи слабата заинтересираност кај повозрасната популација за вакцинација, Филипче кажа дека се регистрирани 180 илјади лица над 70 години и хронични болести, и дека од нив, 50 илјади се пријавиле преку Мој термин или преку матичните лекари, како и дека се планираат други механизми за промоција на ефектите од имунизацијата.
Б. НЕСТОРОСКА
