Европската Унија и лидерите на сите земји членки ја препознаа Република Македонија како држава која ги решава споровите со соседите и како земја на граѓани кои покажаа дека имаат јасно изразена визија за европска иднина, напиша премиерот Зоран Заев на Фејсбук по денешната одлука на Советот на министри за надворешни работи на земјите членки на Европската Унија преговорите за членство на Македонија да започнат во јуни 2019 година.
„Европската Унија и лидерите на сите земји членки ја препознаа Република Македонија како земја на позитивни промени, на динамичен процес на реформи, на инклузивност и на општествен дијалог. Држава која со силна, добронамерна политичка волја ги решава споровите со соседите и земја на граѓани кои покажаа дека имаат јасно изразена визија за европска иднина“, кажа Заев и додаде дека патот на реформи и градењето на нашата земја како држава по европски правила, е неповратен процес.
