Поранешниот специјален обвинител Гаврил Бубевски, познат како експерт за гонење финансиски криминал, е избран за шеф на Основното јавно обвинителство (ОЈО) Скопје.
На денешната седница, Советот на јавни обвинители го избра Стевчо Донев за обвинител во Вишото јавно обвинителство Штип. Бесир Алиу е избран за шеф на ОЈО Тетово.
На седницата беа пополнети и подолго време испразнетите места во Републичкото обвинителство. Соња Симовска и Љупчо Коцевски се избрани за обвинители во Јавното обвинителство на Република Северна Македонија.
ВО СЈО останаа да ги чуваат архивата и останатите државни ресурси само уште обвинителите Ленче Ристоска и Љубомир Лапе. Тие ги застапуваат на суд обвиненијата од СЈО за кои уште нема одлука. На Ристоска предметите ѝ се водат во Одделот за организиран криминал и корупција во Основниот кривичен суд Скопје.
Нови предмети во обвинителствата под кои се водат (ОЈО Скопје и ОЈО Куманово) не им се распоредуваат, а двајцата обвинители не знаат зошто е тој однос кон нив.
С. К. ДЕЛЕВСКА
