На армискиот полигон Криволак денеска заврши воената вежба „Решителен удар 21“, со учество на армиите на Македонија, САД, Бугарија и Грција, како и припадници од составот на Балканските медицински наменски сили. Ова е прва вежба од ваков профил и карактер откако земјава стана членка на НАТО, а е дел од „Браник на Европа 21“ (Defender Europe 21), најголемата НАТО вежба во Европа годинава, предводена од Армијата на САД.

Ова е прва вежба од ваков профил и карактер откако земјава стана членка на НАТО. (Фото: Ѓ. Личовски)

Претседателот Стево Пендаровски кажа дека Македонија во вежбата учествува во двојно својство, и како домаќин на армискиот полигон Криволак и преку припадниците на армијата, и дека „првиот голем тест го положивме“.

„Таквиот тип на наше учество е резултат на високата доверба што сојузниците ја имаат кон нас, кон нашата армија и кон нејзините воени инсталации. Денес сакам да им се заблагодарам на припадниците на Инженерскиот баталјон на Армијата на Република Северна Македонија и на 15 Инженерски баталјон на Армијата на САД кои беа вклучени во развојот и проширување на капацитетите за обука и вежбање на полигонот. Во ‘Решителен удар 21’, освен припадници на Армијата на САД, учествуваат и претставници на армиите на Бугарија и Грција, со што го зајакнуваме билатералното партнерство со овие наши два соседа и во исто време ја интензивираме регионалната соработка во областа на одбраната и безбедноста“, рече Пендаровски на Криволак.

Грчки воен авион на вежбата на Криволак. (Фото: Ѓ. Личовски)

Тој најави и дека земјава ќе продолжи со инвестирањето и развојот на полигонот Криволак, кој повеќе не е само македонски воен капацитет, туку и капацитет на целата Алијанса.