Бројот на новодијагностицирани пациенти со мултипла склероза (МС) постојано расте, секоја година се дијагностицираат нови 90-120 пациенти, а терапијата е недостапна и за оние кои се поставени на терапија, рече Ана Карајанова-Димитрушева, претседателка на Националното здружение за МС, на денешниот настан за одбележување на Светскиот ден на МС. Мултипла склероза е една од најчестите невролошки нарушувања и причини за инвалидитет кај младите возрасни лица. Тоа е хронична, прогресивна, имунолошки посредувана, воспалителна и дегенеративна болест на централниот нервен систем.
Во Македонија од МС боледуваат околу 1.500 лица додека во светот има повеќе од 2,3 милиони лица. Повеќето лица со МС се дијагностицираат на возраст од 20 до 40 години, и околу два-три пати почесто се дијагностицираат жени наспроти мажи. Причината за МС сѐ уште не е позната и до сега не постои лек, но постојат лекови кои можат да им помогнат на лицата со МС да ја стават болеста под контрола и постојат многу опции за подобрување и управување со симптомите.
„За поздравување се заложбите на здравствените власти во соработка со тимот од Универзитетска Клиника за неврологија, за зголемување на бројот на лица со МС кои примаат ефикасна терапија во изминатите години, но и покрај тоа соочени сме со недостапност на оваа терапија за голем број пациенти со МС кои веќе се поставени на терапија. Во слична ситуација се и оние кои чекаат со месеци да добијат современ третман.П ричините за оваа состојба може да се бараат во недоволниот буџет доделен на Клиниката за лековите за МС, што резултира со немање доволно средства за набавка на лекови и за постоечките пациенти кои веќе се на третман неколку години“, рече Карајанова-Димитрушева.
Таа додава дека овие лица се млади, работоспособни кои сѐ уште можат да го дадат својот придонес во општеството, но ако и понатаму останат без терапија согласно природата на самата болест постои ризик за прогресија и појава на неповратен инвалидитет, што од друга страна ќе се рефлектира со значителен товар врз самиот пациент и неговото семејство, а претставува и сериозна импликација и негативен економски импакт врз социјалниот, здравствениот и пензискиот фонд во подолг временски период.
Мотото на годинешното одбележување на Светскиот ден е MS Connestions – МСПоврзувања, коe годинава е околу поврзувањата на лицата со МС во заедницата и во општеството.
По повод Светскиот ден на мултипла склeроза – 30 Mај, Националниот сојуз на лица со телесен инвалидитет на Македонија претпладнево низ Скопје организираше марш за подигнување на јавната свест за проблемите со кои се соочуваат лицата со мултипла склероза и нивните специфични потреби за поквалитетен живот и социјална инклузија.
Б. НЕСТОРОСКА
