Осудувајќи го насилството и барајќи одговорност за сторителите, Хелсиншкиот комитет за човекови права на Република Македонија побара одговорност за полицијата и за нејзините раководители.

„Видно од многубројните видеоснимки, полицајците задолжени за чување на јавниот ред и мир и на безбедноста на присутните во собраниските сали, дозволија непречен влез на демонстрантите. Влезот им беше дозволен и на лица кои беа маскирани со „фантомки“ и со качулки и кои со себе носеа тврди и остри предмети наменети за загрозување на физичкиот интегритет на присутните во Собранието. Набргу потоа беа повредени неколку пратеници, а на местата на извршувањето на кривичните дела не беше забележано присуство на полиција“, се вели во соопштението.

Хелсиншкиот комитет укажува дека одговорноста за ваквиот вандалски чин е кај напаѓачите, организаторите на протестот и особено кај присутните полициски службеници и нивните претпоставени.

„Хелсиншкиот комитет ги повикува Секторот за внатрешна контрола при МВР и јавното обвинителство да спроведат итна истрага за утврдување на одговорност кај сите инволвирани во денешните насилни немири. Истрагата мора да почне со приведување на сите полициски службеници кои ја злоупотребија својата положба, нивните претпоставени, напаѓачите и организаторите на протестот „За заедничка Македонија“, стои во соопштението.